台中宮原眼科遊記 唔係睇病而係食雪糕?!

(文:Winnie)

台中有一個十分熱門嘅景點，就係位於台中火車站前的宮原眼科，點解會咁受歡迎?因為外觀特別，入面賣嘅野更特別，仲好有歷史價值添!

宮原眼科在1927年由一名日本眼科醫生開設，發展最蓬勃的時期除左眼科醫院外，仲開左各式商店，人氣同而家不遑多讓。但因為1999年台灣921大地震，令宮原眼科建築物受創，2008年再受強颱風吹襲，令宮原眼科一度成為危樓。

好彩，台灣有名的糕點集團日出用左一年半時間，聯合兩位建築師同一位古蹟修復博士打造左而家嘅超人氣景點。成功將宮原眼科原本嘅特色紅磚牆、舊牌樓完整保留，而入面則裝修成仿古挑高圖書館，非常好咁貫徹存舊立新的意念!

去到宮原眼科，第一樣會哇出聲嘅就係外面嘅古建築。經復修後的宮原眼科完全睇唔出係危樓，只感受到濃濃嘅歷史感。

入到去，就係第二聲哇!因為挑高圖書館的設計打造得非常精緻，唔知點解令人有去左魔法世界嘅感覺，可能因為同哈利波特入面嘅場景太似啦。

每個角落的設計都好有心思，例如牆上嘅梅花就用傳統剪粘技術製成

第三個哇係俾宮原眼科入面嘅雪糕，畢竟是為食而來的呀!雪糕價錢唔算太貴(同香港比較，以台灣物價算小貴)，但超多特別味道可以揀，選擇困難症立即發作><!

雪糕味道香濃，而且配料可以任加，會唔會太抵呀(收番上面句唔算太貴，應該話係超平!)

其實宮原眼科唔只雪糕，仲有好多糕點手信可以帶番香港，全部包裝都好靚，而且日出集團出品唔會太差，大家去到可以選購下。

超有心思的擺放

宮原眼科

地址: 臺中市中區中山路20號 

官網: http://www.miyahara.com.tw/index.html

營業時間: 10:00 ~ 22:00