【2019 韓國早餐推薦】必食韓式早餐五大推薦

老土咁講:一日之計在於晨。去旅行就算幾趕行都好，都要食個地道靚早餐，嘆番個good morning，全日都精力充沛啲！今次同大家總結左三間韓國必食早餐店，全部都交通方便，非常易搵，唔洗擔心去完早餐店冇時間去其他景點啦！

本粥 본죽

本粥呢間店由花樣男子時期開始受歡迎，皆因佢就係劇中女主角打工嘅粥店。本來對韓國粥冇咩興趣，一來食慣香港粥店口味，二來佢賣相唔算十分吸引。但有次去韓國，本粥正正係民宿對面，所以冇咩期望咁入左去試。照住正常劇情發展，果然一試愛上。韓國粥唔似我地平時食嘅咁流質，口感「杰」好多，但亦因為咁食落好有滿足感。而且粥十分足料，我叫左一碗辣魷魚粥，基乎啖啖都食到魷魚，而且有海鮮嘅鮮味，好好食!至於我到底有幾愛本粥?就係首爾又食去到釜山都要再食><

(粥嘅選擇好多，本人推薦有海鮮的，比用肉類煮的更鮮味，口感更豐富。如果想清淡少少可以揀唔辣或者野菜，一樣好味)

(韓國食咩都會跟小菜，連食粥都有，其中紅色個碟雖然唔太舍係咩，但連埋粥一齊食好香好夾)

正直的金老師 바르다김선생

如果有睇韓國超人回來了，入面大韓民國萬歲食到停唔到嘅餃子店就係呢間 -正直的金老師，入面主要賣餃子同紫菜飯卷，而三胞胎最愛就係佢嘅餃子。試完就明白點解佢地會咁愛餃子，因為餡料由排骨肉製成，好滑，而且調味帶甜，最岩小朋友口味，另外餃子皮好煙韌，唔會一夾就爛，加上食落唔油膩，唔覺意就會食哂成籠。除左餃子，店入面嘅紫菜飯卷都出名，亦有麵食提供，但我覺得冇咩特別，就唔多介紹了。

(見佢地食得咁開心，我都想一齊食呀!)

超人氣Isaac

Isaac可以話係韓國最人氣嘅早餐選擇，可以話係冇人唔知，而係街到都好易搵到Isaac嘅分店。簡單黎講，佢就係專賣三文治，有好多唔同口味可選，選完後店家會即製三文治，所以次次食都熱辣辣，令漏足感大增。另外，Isaac通常都好多料，再加埋佢地自家製嘅醬，令到味道更豐富。但要注意Isaac分店大部分店面好細，有D仲冇提供座位，想舒服咁食嘅朋友就未必太岩。另外溫馨提示少少，佢醬汁口味偏甜，如果唔太鐘意甜味嘅朋友可以叫佢落少D醬。

(超多選擇)

飯卷天國 김밥천국

飯卷天國是韓國最大型的平價連鎖餐廳，主要賣不同口味的飯卷，也有韓國拉麵、餃子等韓式食物。因為係大型連鎖店，基本上首爾大部分地區都搵到佢，趕行程冇時間慢慢食早餐，可以點一份外帶的飯卷，好味又飽肚。另一重點就是飯卷天國價錢非常平民，一個飯卷最平₩ 1,500就有，想要豐富一點都是價錢都是₩2,500至₩5,000左右，好抵食!

Dunkin Donuts

Dunkin Donuts是美國品牌，1994年在韓國開業後人氣一直好高，仲請左唔少人氣韓星如李敏鎬、李光洙等做代言人。係韓國各地有成500間分店，可以話係「梗有一間係左近」。除左冬甩，朝早想飲番杯咖啡嘅朋友都可以試試Dunkin Donuts

的咖啡，評價都唔錯。

因為唔少車站都有Dunkin Donuts分店，所以要早起去搭火車Dunkin Donuts係一個好好嘅選擇!

店舖地址:

平時介紹食店一定要附埋地址，點解今次冇?因為上面五間都係韓國連鎖店，有過百間分店，基本上旅遊熱點如明洞、東大門、梨花女大、新村、弘大等地都有分店，只要出發前search下，或者問問下榻嘅酒店或者民宿，應該都唔難搵到。而且店內都會有中文或英文菜單，點野食冇難度!

作為參考(但只得韓文):

本粥官網: http://www.bonjuk.co.kr/brand/menu_list3.asp?spart=1

正直的金老師官網: http://www.teacherkim.co.kr/barda_main.php?userAgent=PC

飯卷天國官網: http://www.kimbab1009.com/

Dunkin Donuts官網: http://www.dunkindonuts.co.kr/

(圖片取自網絡)