行山都要仙氣/霸氣盡露！做個山系型人！

日本周圍都係多好山好水，好多人都鍾意一家大細去郊外玩。上山下海都好，最重要係個造型！所以今日就話你知點先可以成為一個山系型人！

山系基本裝備
山系係日本其實都有左一段時間，本來係由好有仙氣嘅森女演變成YAMA GIRL，跟住連男仔都跟風，所以依家山系打扮就成為男女通用。功能與時尚並重對山系打扮係最重要嘅，如果著得好靚但根本唔方便活動，咁咪唔型囉！
小編為你歸納左以下3大山系打扮重點：
＊多層穿搭
＊圖案繽紛
＊細緻配備

層層有意義
著到一層層咪好煩？錯！就係依個可加可減嘅穿搭方法先可以令你係郊外變幻莫測嘅天氣下都可以保持時尚。基本上可以分3層，各有唔同功能：
打底：吸汗，令皮膚保持乾爽舒適
面衫：保暖，同時快乾又透氣
外套：擋風、防水，都唔可以焗

有左以上3層就可以凍就著熱就脫，打風落雨，甚至落雪都唔怕！

色彩搭配有技巧
森系作為山系嘅始祖係走大地色嘅風格，但去到山系就變得色彩繽紛。其實一般嘅行山裝束都會有螢光色，咁就算唔小心有咩意外跌左落山，要搜救昤都會方便救援人員易啲睇到你係邊。所以著得顯眼啲都唔係為左靚咁簡單。怕五顏六色唔識襯？等小編醒你3個貼士：
互撞花紋：有兩種以上嘅圖案就唔好重複，花紋同花紋之間可以用淨色隔開。

搶眼顏色：其中一件最吸睛，其他就可以沉色啲。
單色調：以上兩種方式都未處理到，可以用曬一種色，包你點襯都唔會出事。


必備小物
最唔少得一定係有靚襪襯鞋，同埋背囊，兩樣野都一定要舒服又實用。

帽亦都係造型中好重要嘅一部份。除此之外，女仔都可以試下唔同嘅頭飾同髮型。
之後其他仲要帶咩就睇返個人需要啦。

裝備齊全之後，就可以出發啦！
 

文章來源：Like Japan